ENDL IES Castro de Baronceli

Concurso de carteis

2010-04-05T20:34:00.001+02:00

Os Departamentos de Plástica, Galego e ENDL convocan o Concurso de carteis "III Romaría das Letras Galegas".

Bases:

Poderán participar todo o alumnado do IES Castro de Baronceli.
O soporte e o tamaño serán de material que poida ser reproducido.
No cartel deberá aparece a seguinte lenda:

III Romaría Popular das Letras Galegas
24 de maio de 2010
IES Castro de Baronceli

    4. O cartel gañador reproducirase para anunciar a Romaría e o autor ou autora recibirá un trofeo.
    5. Poderanse establecer un ou varios accésits para os máis destacados.
    6. Os orixinais deberán presentarse antes do 29 de abril na secretaría do centro.

Alta nobreza...

2010-01-07T14:48:00.000+01:00

Verín: alta nobreza, entroido e augas que curan

Artigo xornalístico cun rápido percorrido histórico e enumeración do patrimonio natural e cultural da comarca de Monterrei. Publicado n'A nosa Terra Diario.

Concurso de Postais

2009-12-28T22:21:00.006+01:00

Postais premiadas no
Concurso de Felicitacións de Nadal

Primeiro Ciclo

1.º Premio: MARÍA ISABEL ÁLVAREZ

2.º. Premio: TANIA PRIETO

Segundo Ciclo

1.º Premio: SORAYA VILELA

2.º Premio: LUIS BORRAJO

Bo Nadal

Fotos na Galería

Navega en galego

2009-12-01T21:54:00.001+01:00

Podes configurar o teu navegador para dicirlle ao mundo que usas o galego.

Vía: SNL Cerceda

Concurso de felicitacións de Nadal

2009-11-18T23:31:00.000+01:00

Os departamentos de Educación Plástica e o ENDL convocan:

CONCURSO DE FELICITACIÓNS DE NADAL

Bases:

Cada alumno pode participar cunha felicitación.
Deberán ter texto e/ou debuxo alusivo ó Nadal.
Poderán entregarse en secretaría ata o día 9 de decembro.
Establecense dous premios, un por ciclo.
Os departamentos de Galego e Plástica valorarán a participación e a dedicación ó concurso.

Banda deseñada do Magosto (1.º ESO)

2009-11-09T19:57:00.001+01:00

TEMOS PALABRAS MILENARIAS

2009-10-08T11:57:00.005+02:00

Temos na boca palabras milenarias
para falarmos de castaños e carballos
de andoriñas e de niños de paxaros
de fontes, de fervenzas de regueiros,
de rías, mares, cabos e areeiros.

Temos na boca palabras milenarias
para falarmos da carqueixa e da chorima
da barba de raposo e da herba das feridas
de xoubas, de arroases, de baleas
de dornas, de gamelas, de sereas.

Temos na boca palabras milenarias
que afiaron coitelos dos cinco continente
se buscaron peixes dos mares máis ferventes
que andaron os camiños co peixe na patela
segaron moito trigo nas terras de Castela

Temos na boca palabras milenarias
que teñen a gala ser lingua proletaria
que deu chegado a culta e empresaria.
Cristo concedeulle dignidade de litúrxica
e os poetas puxéronlle a cor e mais a música

Temos na boca palabras milenarias
rescatounas todas a pluma de Sarmiento
e mais os que dormen na paz de Bonaval
palabras de Rañolas, Merlín, de Migueliño,
Adrián Soutelo, de Galván e de Balbino.

Temos na boca palabras milenarias
elas dannos pobo e prometen un futuro
pero como isto non está seguro
todos os amigos firmámolo convenio
de que a nosa lingua viva outro milenio.

XESÚS FERRO RUIBAL

In languages we live. Voices of the world

2009-09-08T12:27:00.007+02:00

O vídeo dura case unha hora e vai expoñendo diferentes situacións no mundo como exemplo do que esta a ocorrer en todo o planeta: o perigo inminente de desaparición do gran patrimonio lingüístico da humanidade.

Nun momento determinado chámase a atención sobre a importancia dos adolescentes na transmisión de todas as linguas dunha xeración a outra.

Ti importas, as túas linguas son importantes. Estás concienciado?

_________________

Vía Xoán Costa en ´agora rede

Como falan no Riós

2009-06-21T20:06:00.002+02:00

Programa Ben falado (TVG), emitido o 4 de novembro de 2008.

Trufas de chocolate

2009-05-27T19:19:00.003+02:00

TRUFAS DE CHOCOLATE

Premio do II Concurso de Larpeiradas (2009)

Receita de LILIANA

INGREDIENTES:

Chocolate marca "Nestlé" para fundir.
Un bote pequeno de leite condensado.
250 gramos de manteiga.
Fideos e chocolate marca "Valor" para adornar.
Opcional: un pouco licor.

PREPARACIÓN:
Derreter ao baño maría o chocolate e a manteiga. Ir engadíndolle o leite condensado e remexer para que quede unha mestura uniforme.
Verter nunha fonte longa e introducir no frigorífico. Ao día seguinte raspar cunha culler e facer boliñas pequenas e emboligalas nos fideos.
Pódense conxelar para conservar mellor.

Liliana (3.º ESO)

II Romaría Popular das Letras Galegas

2009-05-19T01:20:00.000+02:00

Correlingua

2009-05-14T21:37:00.006+02:00

Aquí estivemos nós, cos nomes dos amigos nas camisetas e tamén algunha sinatura de Hugo Torreiro. Na retagarda, o equipo ao completo do Departamento de Galego:

+internet+galego+futuro

2009-05-07T19:58:00.000+02:00

Maios 2009

2009-05-03T19:56:00.001+02:00

Os nosos profesores
teñen moita paciencia,
só con miralos
contáxiannos "sapiencia".

O profe de informática
é moi enrollado,
armámoslle a festa
e calquera lado.

Os deste instituto
fomos de excursión,
sete días en Andorra
molaron mogollón.

Texto íntegro:
Coplas dos maios 2009
Certame Enrique Gómez Pato

Rubén Riós bótanos unha man co Maio!!!

2009-04-29T22:34:00.003+02:00

E ti, non vas participar!?

Aí vén o maio

2009-04-20T20:17:00.005+02:00

Castrexos do Baronceli, estades convidados a participar no "Maio" artístico que o centro presentará no certame convocado polo Concello de Verín.

Podedes participar do seguinte xeito:

Compoñendo as coplas.

Achegando materiais para o maio.

Participando na elaboración do maio nas vindeiras semanas.

Maio, 2007: Coplas

Maio, 2008: Coplas

Maxicamente Vello

2009-03-26T21:58:00.004+01:00

POEMA: "A fala" de Manuel María
MÚSICA: Roi Casal

O idioma é a chave
coa que abrimos o mundo:
o salouco máis feble,
o pensar máis profundo.

O idioma é a vida,
o coitelo da dor,
o marmurio do vento,
a palabra de amor.

O idioma é o tempo,
é a voz dos avóse
ese breve ronsel
que deixaremos nós.

O idioma é un herdo,
patrimonio do pobo,
maxicamente vello,
eternamente novo.

O idioma é a patria,
a esencia máis nosa,
a creación común
meirande e poderosa.

O idioma é a forza
que nos xungue e sostén.
Se perdemos a fala
non seremos ninguén!

O idioma é o amor,
o latexo, a verdade,
a fonte da que agroma
a máis forte irmandade.

Renunciar ao idioma
é ser mudo e morrer.
Precisamos a lingua
se queremos vencer!

Concurso de carteis

2009-03-14T10:06:00.004+01:00

O ENDL convoca concurso do cartel da II Romaría Popular das Letras Galegas.

Bases:

Poderán participar todos os alumnos e alumnas do centro.

O formato e materiais deberán permitir a súa impresión. Levarán a lenda "II Romaría Popular das Letras Galegas".

Os exemplares entregaranse en secretaría baixo lema ou pseudónimo antes do 25 de abril. Achegarase, asemade, un sobre cerrado á parte co pseudónimo por fóra e o nome e curso do autor no seu interior.

O gañador/a, de consideralo así o xurado, recibirá un agasallo. Haberá un único premio e o cartel será editado e distribuído para dar a coñecer a Romaría.

Os participantes aceptan estas bases.

Cartel do ano pasado

Historia dunha careta

2009-02-14T15:10:00.000+01:00

Láminas deseñadas por Francisco Diéguez, coordinador do ENDL do IES Castro de Baronceli.

Toponimia "in valle Varoncelli discurrente rivulo Tamega"

2009-02-05T20:20:00.009+01:00

Queres saber por que o topónimo LAZA fai alusión ao frío?
Que se sementaba e arrincaba nas ESTIVADAS para recibir tal nome?
Que venerables anciáns lle deron nome a VILARDEVÓS?
Que forma está detrás do NAVALLO e non ten nada que ver cos coitelos?
Cales son as dúas posibilidades para explicar a orixe de VERÍN?
A que sabían as primeiras augas de SOUSAS?
Sabías que o noso río TÁMEGA é irmán lingüístico do TÁMESIS londinese?

Atoparás a resposta a todas estas cuestións e moitas outras que teñen que ver coa toponimia no recente libro adquirido polo ENDL e depositado na biblioteca.
F. CABEZA QUILES,
Toponimia de Galicia.
Editorial Galaxia, Col. Guías AZ.

Deixámosvos con todo un clásico da filoloxía galega, que a profesora Beni coñece moi ben.

SERVOI. Servoi é o nome dun lugar e parroquia do concello de Castrelo do Val (Ourense), emprazado no val de Verín. Neste val, denominado na Idade Media "Baroncelli" ou "Varoncelli", por onde discorre o Támega, existiu un mosteiro chamado "Servo Dei", o nome do cal aparece nun documento do ano 1132: "De monasterio Servo Dei, quid (o cal) est in Valle Varoncelli discurrente rivulo Tamega"; antigo Servo Dei, que debe ser, xa que logo a base etimolóxica e significativa do actual Servoi, que parece representar o nome persoal Servusdei. Tal como aparece Servusdei quere dicir "servo de Deus", expresión ou fórmula de humildade cristiá e de reverencia a Deus tipicamente medieval, que se debeu converter moi pronto en nome de persoa. Tal fórmula aparece unha chea de veces ao principio de moitos documentos. (...)
Xa nun documento do ano 992 aparece un abade do mosteiro de Celanova chamado, precisamente Servusdei: "servo Deo abbati", quizais tocaio do posible fundador do devandito mosteiro así mesmo chamado "Servo Dei" do val de Verín; cenobio que puido recibir o nome do seu primeiro reitor, hoxe toponimizado no nome de lugar Servoi.

ACTIVIDADES DE DINAMIZACIÓN SOCIOLINGÜÍSTICA PARA O SEGUNDO TRIMESTRE

2009-01-16T11:48:00.005+01:00

Entre as actividades previstas para toda a comunidade escolar neste segundo trimestre destacan as seguintes relacionadas co entroido:

* Concurso de caretas
* Festival de disfraces e carreira solidaria
* Xogos populares
Temos ademais convocado o "Concurso de Carteis para a II Romaría das Letras Galegas"
Dende o equipo de normalización pedímosvos participación xa que no primeiro trimestre a implicación do alumnado non foi a que se esperaba.Mención especial para Soraya Vilela de 3ºB que resultou gañadora no "Concurso de Felicitacións de Nadal"

Banda deseñada (magosto, 2008) - 1.º ESO

2008-12-05T00:03:00.006+01:00

Banda deseñada, 1.º ESO (Magosto, 2008)

Recursos lingüísticos

2008-11-27T20:54:00.003+01:00

Recursos para o galego é unha completa recompilación de enderezos que facilita o coñecemento e o acceso doado a programas correctores, dicionarios, gramáticas, tradutores e outras ferramentas. Útil para gardar nos favoritos do teu computador.

Dicionario Visual Interactivo

2008-11-18T20:56:00.002+01:00

Este dicionario é unha ferramenta para a iniciación ao galego do alumnado procedente do estranxeiro.

http://centros.edu.xunta.es/contidos/dicionariovisual/

Por que estudar português na Galiza?

2008-09-23T09:48:00.002+02:00

Cartaz de Docentes de Português na Galiza:

Palabras encadeadas

2008-07-08T19:04:00.000+02:00

Concurso de larpeiradas

2008-05-24T15:56:00.014+02:00

Pois ben, o día da romaría se cataron esas larpeiradas, alguén falaba con entusiasmo do boas que estaban a maioría delas e xa estaba pensando en repetilo para o curso que ven.
Para que todos podamos revivir ese momento, iso si con un pouco de traballo (xa que hai que elaborarlas) deixovos un documento coas receitas. Receitas.doc.

Noraboa a todas e todos os participantes, en especial as gañadoras do concurso que foron:

1º Premio: Alba Rodríguez Losada, pola Torta de leita callado e arandos

2º Premio: Isabel (a profe de Historia), pola Torta de tiramisú

3º Premio: Belén Rigüela, pola Bica de iogures e noces.

Felicitacións a La Gazeta de Terzero

2008-05-10T01:48:00.002+02:00

Dende o ENDL do Castro de Baronceli queremos felicitar a Israel polo seu acertado e bonito traballo cós alumn@s de terceiro, (ou terzeiro), polo segundo número de La Gazeta de Tercero cuio éxito esperemos se prolongue ó longo de moitos anos, felicitar asi mesmo ós alumnos e alumnas de terceiro polo seu esforzo e a calidade dos seus artigos.

1ª Romaría Popular das Letras Galegas

2008-05-09T12:11:00.009+02:00

Queremos por vez primeira poñer en marcha unha romaría popular dedicada ás letras galegas adicada neste ano a Xosé Álvarez Blázquez.

Programa: 19 de maio de 2008

14:00 - 15:00 Xantar campestre no patio do instituto. Cata dos doces do 1º Concurso de Larpeiradas. Animación musical e baile.

15:00 - 15:30 Portas abertas, visita guiada para pais e nais.

15:30 - 15:45 Inauguración da Aula Xesús Taboada Chivite (Aula 4)

Actuacións no comedor:

16:00 - 16:30 Teatro. Aventuras e desventuras dunha espiña de toxo chamada Berenguela, de Manuel María. Peza dramática en nove actos breves a cargo da compañía teatral de 1º de ESO.

16:30 - 17:00 Recital poético-musical en honor de Xosé María Álvarez Blázquez.

17:00 - 17:10 Entrega dos premios (Concurso de Larpeiradas, Concurso de Marcapáxinas, Certames Literarios do Concello de Verín, ...)

Podedes ver unha reportaxe fotográfica da romaría aquí

Coplas dos maios 2008

2008-05-08T13:43:00.009+02:00

Os alumnos e alumnas do IES Castro de Baronceli cumpriron sobradamente e aquí temos as magníficas coplas elaboradas por eles. Debo felicitalos pois o nivel exhibido nas rimas é excelente, case tanto como a retranca que teñen os versos.
Podédelas ler no enlace premendo aquí.

Ademáis fixemos un maio que aínda que alguén me acuse de subxectivo, debo dicir que estaba moi bonito.

Aquí podemos ver o maio exposto na praza do concello.

Os Maios 2008

2008-04-26T00:27:00.002+02:00

Xa se achega o maio florido e hermoso
e todos pensando que por nas coplas,
xa chega despois do abril chuvioso
o mes no cal se deciden as notas.

Xa hai unhas semanas que non vos vexo
pois disfruto dos días da paternidade,
animarvos a que fagades as coplas quero
para poñer no blog as de máis orixinalidade.

Ben sei que estas me quedaron un pouco frouxas, pero sei que vós as ides facer moi ben, así que dende aqeuí anímovos a escribilas e encanto poda as publicarei aquí co voso permiso para que todo o mundo poda ver a creatividade, orixinalidade e sentido do humor que tedes todas as alumnas e todos os alumnos do IES Castro de Baronceli.

Dicionario Ir Indo

2008-04-24T15:34:00.005+02:00

A editorial Ir Indo acaba de pór na rede unha versión electrónica do seu dicionario galego. Ofrece 65.000 entradas con todas as modificacións das Normas Ortográficas e Morfolóxicas do ano 2003. Nisto supera xa ao mesmo dicionario en rede da Consellería, aínda sen actualizar. Pero ademais ofrece a etimoloxía e a equivalencia en castelán, portugués e inglés. No futuro deberá incorporar sinónimos, antónimos e frases feitas.

Próbao neste enlace: Dicionario Ir Indo

Outros dicionarios de galego na rede:

Consellería de Educación-RAE
Dicionário electrónico Estraviz

(Vía Código Cero)

Día da Prensa

2008-03-15T01:06:00.001+01:00

Estamos seguros de que en calquera hora lectiva do curso e en calquera centro educativo un estudante pasa as follas dun xornal ou un profesor reparte fotocopias de novas ou artigos. Se así non fose, deberiamos preocuparnos. En calquera aula e en calquera materia, aínda que sexa un só alumno e un só profesor. O que non é normal é que todo un centro de douscentos alumnos se poña de acordo para saír á mesma hora das aulas á procura da información. A actividade de busca de datos nas diversas seccións dun xornal repartidas por todo o instituto, para o cal tiñan que orientarse cun plano, coidamos que foi satisfactoria. Grazas a todos por axudar de parte do Grupo de Traballo da biblioteca.

Reunión do ENDL

2008-03-05T13:50:00.005+01:00

O pasado venres 29 de febreiro reunímonos os compoñentes do ENDL na sala de Medios Audiovisuais para tratar, entre outras cousas, das actividades do terceiro trimestre, aprimeira delas será o "Correlíngua", (www.correlingua.org/), a Semana das Letras Galegas, o Maio e unha celebración de xogos populares, para todos os que queiran aportar algunha idea ó respecto vai esta mensaxe, estamos abertos a calquera idea que poidades aportar.

Jujel é juai

2008-02-15T13:26:00.004+01:00

Jujel é a versión jaleja para Jalisia.

Funsiona como os demais

na túa páxina de inisio.

http://www.jujel.es/

Entroido solidario - Concurso de disfraces

2008-02-14T00:30:00.003+01:00

Tamén con motivo do entroido se realizou un entroido solidario para reacudar fondos a favor da ONG Save the Children, que consistiu nun apadriñamento dos alumnos que participaron na carreira solidaria, cantas máis voltas deran ó circuito, máis cartos recaudaban en favor da ONG, sendo esta unha maneira de valorar o esforzo dos alumnos, (todo isto organizado por Dori), algúns correron disfrazados participando no concurso de disfraces do entroido solidario para o cal. este Equipo de Normalización e Dinamización Lingüística aportou a cantidade de 50€ en vales canxeables en tendas de deportes.

Obradoiro de caretas de entroido

2008-02-14T00:08:00.006+01:00

Temos que felicitar a María polo traballo desenvolvido cos alumnos no obradoiro de caretas de carnaval, hai que dicir que co pouco tempo dispoñible a cousa saíu bastante ben e para mostra as imaxes. Grazas María polas fotografías e felicidades tamén os alumnos e alumnas que fixeron unhas caretas moi fermosas.

Unha vez pintadas, (non temos fotos do proceso de pintado, xa que por falta de tempo foron pintadas na casa e non no centro), podemos apreciar o resultado

Obradoiro de elaboración de caretas de Entroido

2008-01-23T23:13:00.000+01:00

O Equipo de Normalización e Dinamización Lingüística puxo en marcha un obradoiro para facer caretas para o entroido, para iso contamos coa colaboración do Departamento de Plástica, no que María fai un esforzo por sacar adiante este obradoiro xunto coas tarxetas de San Valentín do Depatamento de inglés,
¡Ánimo María!.
Paco proporcionou uns vídeos onde se elaboran as máscaras dos cigarróns, onde él mesmo é todo un artista, ademáis proporcionounos unha serie de láminas tamaño A3
elaboradas tamén por él mesmo, na que nos mostra como son e como é o taller onde fai as caretas titulada "Historia dunha careta" cuias imaxes podemos ver.

Xa chega o ENTROIDO

2008-01-16T11:57:00.000+01:00

Acabamos de chegar das vacacións de Nadal e xa temos que pensar de que nos imos disfrazar no entroido que chega xa na primeira semana de febreiro, o Equipo de Normalización e Dinamización Lingüística preparará un pequeno taller para a elaboración de máscaras que esperamos que vos resulte interesante.

Felíz 2008

2007-12-28T12:31:00.000+01:00

O Equipo de Normalización Lingüística deséxavos a todos e a todas un excelente 2008, que veña cheo de boas cousas, de ganas de estudar e por suposto de aprobados ó longo do ano.

Así naceu o himno

2007-12-22T13:00:00.000+01:00

Especial "100 anos do himno" da TVG.
Primeira parte:

Segunda parte:

Resultado do concurso de felicitacións do Nadal

2007-12-20T12:56:00.000+01:00

Nesta semana fíxose a votación dos traballos presentados ó concurso, todos e todas parcicipastes na votación, na que se establecían dous premios, un para cada ciclo de E.S.O.
Tra-la votación popular xa podemos dicir que as gañadoras do concurso foron as seguintes.

Premio do 1º ciclo de E.S.O.:
Mª Olga de Aragón Rodríguez

Premio de 2º ciclo de E.S.O.:
Bibiana López Francisco, de 4º B

Felicidades ás gañadoras, que recibiredes o premio que consiste nun MP4 para cada unha. Disfrutádeo, e ¡Felices Festas para tod@s!. Vémonos o próximo ano 2008.

Podédelas ver premendo nas fotos da esquerda ou premendo aquí.

Boa participación no concurso de felicitacións de Nadal

2007-12-15T15:35:00.000+01:00

Ben, moi ben. Esta vez si que vos portastes, hai unha chea de felicitacións de Nadal e algunhas moi bonitas e moi traballadas o que vai a meter nun apreto ó xurado que teña que decidir cales van a ser as felicitacións gañadoras. Nesta última semana antes das vacacións xa coñeceremos o nome dos gañadores ou das gañadoras.

Agradecemento á colaboración dos Concellos

2007-12-07T22:27:00.000+01:00

Despois da reunión que tivemos con representantes dos Concellos queremos facer mención neste blog á atención prestada, en especial ó Concello de Verín e de Oímbra, os cales mostraron interés e apoio a este Equipo de Normalización e Dinamización Lingüística. Pois ben, o Concello de Oimbra mandounos información sobre lugares de interese turístico que aproveito para poñer neste blog e que dende logo paga a pena visitar. Animo desde aquí ás alumnas e ós alumnos do IES Castro de Baronceli a que presuman dos seus pobos e a que traian fotografías dos monumentos ou dos lugares turísticos que consideren interesantes para publicalas no blog e compartilas cós seus compañeiros e compañeiras.

Resultado do concurso de Bandas Deseñadas

2007-12-03T10:04:00.000+01:00

Xa temos o resultado, gañaron por votación de todos os integrantes do ENDL, do Departamento de Plástica e representantes do Equipo Directivo as seguintes alumnas:

1º ESO

Mª Isabel Villamarín Alonso

Noelia González Salgado

2º ESO

Lorena García Campos

¡¡Felicidades ás premiadas!!.
O premio vai consistir nun cómic e nun mp4 deses que reproducen cancións e videos nunha pequena pantalla.

Se queredes ver as bandas deseñadas en tamaño grande non tedes máis ca premer sobre as imaxes en pequeno que se amosan na parte dereita ou facendo clic aquí

O concurso de felicitacións de Nadal

2007-11-29T13:02:00.000+01:00

Xa está en marcha o concurso de felicitacións de Nadal, espero que vos animedes a participar, o ano pasado a participación foi excelente, así que este ano hai que poñerse as pilas e esforzarse ó máximo para superar o do ano pasado, aqueles e aquelas que pensen que a calidade dos seus debuxos non é boa, non deixedes de participar, tratando de suplir a calidade con orixinalidade, pensade como sería un papanoel galego, unha visión graciosa do nadal ou que o portal de Belén fose por exemplo o portal de Vilardevós, por poñer uns exemplos.

O concurso das bandas deseñadas

2007-11-23T16:04:00.001+01:00

Unha vez máis ,fíxose o concurso de bandas deseñadas co lema "O Magosto", a participación foi pobre, do alumnado do segundo ciclo non participou ninguén, e as bandas deseñadas responderon ós mesmos patróns ca o ano pasado, onde a imaxinación na maioría dos casos foi máis ben escasa, de todos os xeitos non quero que este artigo sexa para dar un tirón de orellas ós alumnos e alumnas que non participaron senón un agradecemento ó esforzo dos alumnos e alumnas que si o fixeron.
Xa estiven falando con Paco, que é, por se alguén non o sabe, o Coordinador do ENDL do Centro, para que se faga un esforzo económico, o máximo que os nosos orzamentos permitan, para premiar a estes alumnos e alumnas.
Dado que houbo máis participación en 1º de ESO que en 2º, chegamos ó acordo de dar
dous premios para 1º de ESO e un para 2º de ESO.

Por certo, a ver se o adiviñades:

Alto me vexo
no meu lugarexo.
Por unha risada,
perdín miña añada.

¿De que se trata?

Benvida

2007-11-19T16:52:00.000+01:00

Este pode ser un punto de encontro se vos animades a participar, para iso teredes que pedir as claves para poder publicar os vosos artigos, opinións, ideas, ...
Pode ser un sitio no que se poderán poñer traballos, poesías, fotografías, chistes, etc, todo o que teña que ver coa mellora do uso do galego na escola. Trataremos sempre que sexa un galego normativo.
A administración do Blog poderá eliminar aquelas entradas que conteñan frases ou fotografías de mal gusto.

Todas as persoas (profesoras, profesores, alumnas e alumnos) que queiran participar poden remitir falar conmigo. (Rafael Nóvoa, colaborador do ENDL e creador deste blog)